Presentación
BENQUERIDOS AMIGOS E COMPAÑEIROS INTERNISTAS:
O XXIV Congreso da Sociedade Galega de Medicina Interna vaise celebrar en Ourense os dias 8 e 9 de xuño, no Auditorio Municipal.
Os internistas ourensáns estamos a elaborar un programa científico que esperamos que sexa de voso interés ; tamén desexamos facervos unha boa acollida para disfrutar desta xuntanza.
Neste avance informámosvos dos principais temas científicos que se van tratar. As mesas redondas versarán sobre:
- Posta ao día en Factores de risco vascular
- Infeccións emerxentes
- Síndrome de abstinencia etílica
Asimismo haberá duas sesións de comunicacións orais ,de tema libre ou relacionado cos temas a tratar nas mesas , e unha Conferencia Maxistral.
A SOGAMI quere impulsar os grupos de estudo formados hai un ano e o comité organizador deste congreso convidou a dous deles,"Factores de risco vascular" e " Alcol" para estableceren cadansúa mesa redonda.
Neste congreso tamén se constituirá,con carácter formal e aberto a todos, o grupo de "Enfermidades infecciosas".
Na cerimonia de clausura faráse a entrega dos premios e axudas da SOGAMI así como os premios ás mellores comunicacións seleccionadas polo comité científico.
As inscricións fáranse unicamente na Secretaria do Congreso; é indispensable que a inscrición se acompañe do xustificante de ingreso.
Animámosvos a presentar os vosos traballos científicos a este Congreso a través da web da Sociedade Galega de Medicina Interna : meiga.info.
Desexamos recibirvos en Ourense, cidade de fonda raigame histórica,que conxuga tradición e modernidade. Situada á beira do "pai Miño",rio que non separa senon que une aos galegos como dan fé as pontes que se foron tendendo ao longo dos séculos, dende a Ponte romana máis antiga á Ponte do milenio de nova e controvertida arquitectura,magnifico miradoiro ao que vos recomendamos asomar.
Estamos a preparar esta reunión con ilusión para podermos ter uns dias de proveito e darvos unha acollida axeitada que nos permita a todos gozar desta xuntanza.
No nome dos comités organizador e científico, unha aperta .
Ricardo Fernández Rodríguez
Presidente do Comité Organizador
